Íslendingur sem er búsettur í Danmörku sendi þessa athugasemd:

— — —

„Held að þú verðir að gera greinarmun á umræðunni og því sem hinum almenna Dana finnst. Sjálfur bý ég í Danmörku og ég ekki séð að frjálslyndi í garð innflytjenda sé horfið, megin þorri fólks horfir sem betur fer með þokkalega skynsömum augum á þessi mál.

Ástæðan fyrir því að innflytjendamál eru svona ofarlega á baugi skýrist af uppbyggingu stjórnmálanna, sérstaklega þeirri staðreynd að stjórnarmyndanir „yfir miðjuna“ eru óhugsandi í Danmörku. Hægri flokkunum tekst einfaldlega ekki að mynda stjórn nema hún sé í það minnsta varin vantrausti af Dansk Folkeparti, af þessu leiðir að oft á tíðum gefa Venstre og Konservative eftir gagnvart DF til þess að koma málum í gegn.  Á þetta spilar DF og það er í rauninni „aðdáunarvert“ hvernig þeim tekst alltaf að finna innflytjenda-flöt á nánast öllum málum. Það sem meira er, að V og Kon verða vegna þessa að líða DF að tala svona herskátt um innflytjendamál, af þeirri einföldu ástæðu að DF hefur líf ríkisstjórnar þeirra í hendi sér. Stundum fá einstaka stjórnmálamenn innan V og Kon nóg og svara DF fullum hálsi, en það verður sjaldan meira úr því en það og vekur þar að auki takmarkaða athygli. Innflytjendamál eru ekki einangrað svið sem lifir sjálfstæðu lífi heldur snerta þau nánst öll velferðarmál. Niðurstaðan verður því miður sú að retorík a la Dansk Folkeparti fær þess vegna að þrífast í fjölmiðlum en á sér kannski ekki samsömun í skoðunum hins venjulega Dana.

Síðan er hin hliðin á málinu og hún er að DF er að sækja fylgi í kjarnafylgi stóru vinstri flokkanna, fyrst og fremst SF en einnig hjá krötunum. Hér á ég við ófaglærða og iðnaðarmenn á landsbyggðinni, þá sérstaklega í miðlungsstórum þéttbýlissvæðum. Þannig að af ótta við að missa fylgi hinna minna menntuðu, þá taka SD og SF þátt í leiknum. Einu flokkarnir sem nánast mótmæla DF-pólitíkinni algjörlega eru Radikale og Enhedslisten.“