Það er mikið á sig lagt í kosningum.

Ég man eftir því einhvern tíma á dögum Alþýðuflokksins að hafa séð Ámunda Ámundason læðupúkast með bjórkassa utan við Hafnarkrána sem var og hét og strollan af ógæfumönnum á eftir honum á leið að kjósa.

Ég veit að í Íslendingabyggðum á Spáni er öllum smalað upp í rútu á vegum Sjálfstæðisflokksins, það eru góðar veitingar í boði, og svo er sungið og trallað og keyrt til ræðismannsins að kjósa. Mér skilst að fyrir síðustu þingkosningar hafi verið brögð af því að þátttakendur kysu eitthvað annað en Sjálfstæðisflokkinn.

Í síðustu borgarstjórnarkosningum varð frægt að Framsókn lagðist á útlendinga sem hér eru búsettir og fékk þá til að kjósa flokkinn.

Um daginn heyrði ég eftirfarandi sögu frá erlendri konu sem er búsett hér. Það var verið að smala útlendum starfsmönnum á kjörstað upp á Landspítala og sumir hlýddu kallinu, En þeim var sagt að þau yrðu að kjósa gamla karlinn – þ.e. Ólaf F.