Nú þegar ríkisstjórnin efnir ti framkvæmda er með ólíkindum að svonefnd Samgöngumiðstöð við Reykjavíkurflugvöll skuli verða fyrir valinu.

Enn er allt óráðið með framtíð flugvallarins, á aðalskipulagi er gert ráð fyrir að hann víki.

Þetta er á sama tíma og ekki er til fé til að halda uppi almennilegri slökkviliðsvakt eða flugumferðarstjórn á vellinum.

Það er heldur ekkert vit í að stefna langferðabifreiðum á þennan stað sem er langt í frá að vera miðsvæðis í bæjarlandinu. Og áform um að strætó gengi þangað í stórum stíl eru vitleysa.

Og þess vegna er þetta ekki annað en ný flugstöð, undir dulnefni.

Einna verst er þó, og það snýr að borgarstjórninni í Reykjavík sem virðist ætla að láta þetta yfir sig ganga án þess að mögla – nefnilega hvernig skipulagsmál í Vatnsmýrinni hafa þróast.

Þar eru nú komnar stórar umferðargötur sem skera svæðið þvers og kruss, og við bætist stórbygging Háskólans í Reykjavík með ógurlegu flæmi bílastæða sem geta vart talist annað en umhverfisslys.

Allt ber þetta vitni himinhrópandi ráðleysis í skipulagsmálum.