Sumir bókaflokkar eru endingarbetri en aðrir.

Þannig er til dæmis með útgáfu hins svokallaða Fornritafélags á Íslendingasögunum. Útgáfan hófst um 1930 og gekk nokkuð greiðlega framanaf. Svo hægðist á, og seint og um síðir uppgötvaðist að allir sem voru í stjórn Fornritafélagsins voru dánir.

Þá var drifið í að kjósa nýja stjórn, og enn eru að koma út fornsögur undir nafni Fornritafélagsins.

Á þjóðhátíðinni 1974 var ákveðið að ráðast í ritun sögu Íslands. Hún hefur verið að koma út smátt og smátt síðan þá og hefur Hið íslenska bókmenntafélag séð um útgáfuna.

Bókmenntafélagið er elsta félag á Íslandi og mælir tímann í öldum en ekki árum eða áratugum.

Nú loksins hillir undir lok útgáfunnar, því ríkisstjórnin hefur ákveðið að veita styrk til að koma út síðasta bindinu sem á að fjalla um tuttugustu öldina.

Og samkvæmt frétt Morgunblaðsins mætti jafnvel álykta að nú hilli undir hin margumtöluðu endalok sögunnar.