Í Kiljunni í kvöld verður fjallað um Þorvald Thoroddsen, jarðfræðinginn og landfræðinginn, sem með réttu má kallast landkönnuður Íslands. Þorvaldur ferðaðist vítt og breitt um landið á síðustu áratugum nítjándu aldar, rannsakaði, mældi og skrásetti, og var líklega merkasti vísindamaður á Íslandi á þeim tíma.

Eitt höfuðverk hans er Landfræðisaga Íslands sem nú er komin út í glæsilegri endurútgáfu hjá bókaforlaginu Ormstungu.

Árni Bergmann segir frá útgáfu sinni á Rússasögum og Igorskviðu, sem kemur út undir merkjum Lærdómsrita Bókmenntafélagsins. Þetta eru fornar sögur, ekki ýkja þekktar, en tengjast að nokkru leyti heimi norrænna manna á víkingatímanum, enda sigldu norrænir menn upp ár í Rússlandi, til borganna Kænugarðs og Hólmgarðs og alla leið niður til Svartahafs.

Kolbrún og Páll fjalla um Veröld sem var eftir Stefan Zweig, sem nýverið hefur verið endurútgefin, og Góða elskhugann eftir Steinunni Sigurðardóttur.

Og Bragi talar um einn af mönnunum sem ákvað að varpa kjarnorkusprengju á Japan, og ill örlög hans.