Ólympíuleikarnir eru að verða hálfgert böl, segir í grein eftir Douglas Haddow í Guardian.. Þeir eru orðnir alltof stórir í sniðum. Grikkir hálfpartinn settu sig á hausinn við að halda Ólypíuleika og nú virðist sú ágæta borg Vancouver vera að fara sömu leið með Vetrarólýmpíuleikana sem hefjast 12. febrúar. Leikarnir þar áttu í upphafi að kosta 660 milljónir dollara en upphæðin hefur sexfaldast og er nú 6 milljarðar dollara. Stjórnin í Bresku Kólumbíu hefur þurft að skera niður alls kyns almannaþjónustu til að eiga fyrir leikunum – það hjálpar ekki að nú er erfiðara að ná í peninga frá einkaaðilum en fyrir kreppu. Fyrirtæki eru ekki jafn gjörn á að „kaupa“ leikana, eins og fór að tíðkast á tíma Samaranchs, forseta Alþjóðlegu ólympíunefndarinnar.

Einn helsti kostnaðarliðurinn er rosaleg öryggisgæsla sem nú er metin á 900 milljón dollara – og setur leiðinlegan svip á þessa borg sem hefur verið talin ein sú besta í heimi til að lifa í.

Í Kanada er talað um The Bailout Games. Íbúar Bresku Kólumbíu eru hvattir til að njóta þeirra – það séu þeir sem borga brúsann fyrir fjárhagsáætlanir sem hafa reynst fáránlega rangar.

Kínverjar gátu haldið sína Ólympíuleika – og komist upp með að eyða í þá milljörðum og aftur milljörðum. En Kína er einræðisríki þar sem er ekkert gegnsæi; leikarnir í Peking báru öll merki herskálakapítalismans sem þar ríkir. Það var hneyksli í sjálfu sér að leikarnir skyldu haldnir þar. 2012 verða Sumarólympíuleikarnir haldnir í Lundúnum. Skipuleggjendur leikanna þar segja að þeir geti ekki boðið upp á neitt í líkingu við Peking – en samt er fjárhagsáætlunin þar löngu farin úr böndunum. Í London er þörf á afar mikilli og kostnaðarsamri öryggisgæslu vegna leikanna. Og þar er varla hægt að fela spillinguna líkt og í Kína.

Könnun Merryll Lynch á Ólympíuleikum sýnir að þeir hafa kostað tíu af síðustu ellefu borgum sem hafa haldið þá fjárhagsvandræði. Versta dæmið er sagt vera Montreal en borgin var í þrjátíu ár að glíma við skuldir frá leikunum 1976. Í Aþenu standa stór íþróttamannvirki engum til gagns, en móti má þó benda á að endurbætur voru gerðar á samgöngum í borginni í tengslum við leikana sem hafa bætt lífsgæðin þar mikið.