Það er nokkuð handhægt að skipta sjálfstæðismönnum í repúblikana og demókrata eins og staðan í flokknum er núna.

Óskoraður leiðtogi repúblikananna er Davíð Oddsson sem notar Morgunblaðið til að ná aftur tökum á flokknum. Aftur er þess farið að gæta að sjálfstæðismenn séu hræddir við að tala opinskátt af ótta við hann.

Í demókrataarminum eru til dæmis Þorgerður Katrín Gunnarsdóttir (sem Davíð og vinir hans leggja fæð á), Benedikt Jóhannesson og Þorsteinn Pálsson.

Þessi armur er farinn að hafa áhyggjur af því að ítök repúblikananna í flokknum séu að verða of sterk. Repúblikanarnir vija enga málamiðun í Icesave og mega ekki heyra minnst á ESB. Demókrötunum finnst fráleitt að Sjálfstæðisflokkurinn sem hefur staðið fyrir öllum meiriháttar alþjóðasamningum sem Íslendingar hafa gert ætli bara sitja og vera á móti þegar samið er við ESB.

Bjarni Benediktsson er svo þarna á milli og virkar oft ráðviltur. Þó er talið að honum sé ekki á móti skapi að semja um Icesave – ólíkt til dæmis Sigmundi Davíð – en það er samt ekki víst að hann áræði það vegna repúblikananna.

Nú má sjá að demókratarnir eru farnir að skipuleggja sig. Búið er að stofna samtökin Sjálfstæðir evrópumenn og nú er  stærsta dagblaðið, Fréttablaðið, komið í hendurnar á þeim. Það er varla tilviljun að á þessum tímapunkti tekur evrópusinninn og sjálfstæðismaðurinn Ólafur Þ. Stephensen við stjórn þess. Sá sem ræður hann til verksins er Ari Edwald, evrópusinni og sjálfstæðismaður, sem er fyrrverandi aðstoðarmaður Þorsteins Pálssonar, evrópusinna og sjálfstæðismanns.

En Þorsteinn á einmitt sæti í íslensku samninganefndinni sem mun sjá um aðildarviðræðurnar.