Jónas Bjarnason efnaverkfræðingur er nýliði í hópi bloggara á Eyjunni. En pistlar hans eru yfirleitt afar fróðlegir.

Í nýjasta pistli sínum sem nefnist Brotlending mörgæsanna skrifar hann meðal annars um kaup þýskra stjórnvalda á upplýsingum um innistæður auðugra Þjóðverja í svissneskum bönkum. Margir skjálfa vegna þessa.

Jónas skrifar:

„Nú er í augsýn, að ekkert fé geti verið geymt á reikningum í skattaparadísum.  Við heyrum hér á landi, að gerðir hafi verið samningar við upplýsingadeildir skattayfirvalda um aðgang að gögnum eða bankastofnunum, sem veita upplýsingar um innistæður.  Um einhverja „pakka“ er að ræða, sem ráða verður í, en íslensk yfirvöld hafa ekki aðgang að reikningum einstakra manna vegna bankaleyndar, sem er á undanhaldi víðast hvar.  Vísast verður hún aflögði í því formi, sem hún er nú, en t.d. stjórnvöld í Þýskalandi munu breyta lögum þarum.  En þá opnast möguleikar til að fá keyptar upplýsingar eins og nú háttar til í Þýskalandi.  Það getur orðið erfitt fyrir íslenska útrásarvíkinga og aðra peningamenn að geyma fé í útlöndum, hvar sem er, af sömu ástæðum.  Hvenær koma CD diskar bara í pósti frá Tortola?  Eða bara tölvugögn í viðhengjum í E-bréfum?  Og þá eiga menn ekki bara að greiða skatta af slíkum eignum heldur einnig sektir, en vísast verður að bæta löggjöfina til að svo geti orðið í raun og sektir það háar, að menn fari að gefa yfirvöldum upplýsingar af sjálfsdáðum.  Já, það verður spennandi að fylgjast með þróuninni.  Og með slíkum uppljóstrunum verður einnig unnt að rannsaka nánar tilurð peningainnistæðna, þ.e. hvernig menn hafa komist yfir þær.“