Valur Ingimundarson, prófessor í sagnfræði, ritar grein í nýjasta hefti Skírnis þar sem hann fjallar um norðurslóðir, svæðið kringum Norðurpólinn, og afstöðu þjóða sem þar telja sig eiga hagsmuna að gæta.

Valur telur í stuttu máli að það sé of mikið gert úr kapphlaupinu um Norðurpólinn sem mikið er fjallað um í fjölmiðlum. Þetta sé vissulega spennandi , en í raun sé ekki raunhæft að að álykta að þarna fari fram mikill stórveldaslagur. Bandaríkjamenn hafi til dæmis verið fremur áhugalausir um þessi mál, enda beinist athygli þeirra annað. Siglingaleiðir gætu vissulega opnast en það væri ekki nema part úr sumri. Vinnsla olíu- og málma sé erfiðleikum bundin vegna óblíðrar náttúru. Viðbrögðin við því þegar Rússar plöntuðu fána undir Norðurskautinu hafi meiri en þeir bjuggust sjálfir við, en við það kviknaði mikill áhugi á málinu.

Þetta eru athyglisverðar pælingar hjá fremsta fræðimanni þjóðarinnar á þessu sviði.

Valur var í viðtali í Silfri Egils í gær. Þar spurði ég hann líka um hugmyndir um stöðu Íslands í alþjóðasamfélaginu, um ríkjabandalag við Norður-Atlantshaf, ríkjasamband við Noreg og stórt norrænt sambandsríki.

Valur sagðist telja allar þessar hugmyndir óraunhæfar.

Viðtalið við Val má skoða með því að smella hérna.