Ég sé á Vísi að Hótel Borg er orðin 80 ára. Og að það var haldið upp á afmælið. Þeir höfðu ekki fyrir því að bjóða gömlum næturverði.

Ég hefði getað samt þeim ýmsar sögur.

Af danska Íslandsvininum sem strunsaði út eina nóttina og sagðist aldrei koma aftur á hótelið, en hann hafði gist þar frá stofnun þess. Þá voru hávær diskótek á neðri hæðinni.

Af Bandaríkjamanni sem líka rauk út og spurði: „Is this a hotel or a brothel?!“

Af verkalýðsleiðtoganum utan af landi og konu hans sem ég neyddist til að vísa út af hótelinu vegna drykkjuláta af herbergi.

Af því þegar ég reyndi að nota munn við munn aðferð við konu sem ég hélt að væri að geispa golunni – en hafði þá bara fengið sér of mikið neðan í því.

Af kynnum mínum af Jóni Páli sem þá var í hópi dyravarða á hótelinu.

Af yfirvaraskegginu sem ég skartaði þá og blazerklæðnaðnaðnum, mér fannst það eini fatnaður sem væri viðeigandi í þessu starfi.

Af því þegar tveir erlendir karlmenn reyndu að lokka mig í trekant.

Af því hvernig ég var spurður hvort ég gæti útvegað vændiskonur – nei, það gat ég ekki.

Af því þegar herlögreglan kom á nóttinni ásamt íslenskum lögreglumönnum til að kanna hvort bandarískir hermenn af vellinum sem fengu að gista á hótelinu væru nokkuð með íslenskar stelpur uppi á herbergi.