Orðið lífsrými kemur fyrir í grein Ögmundar Jónassonar um Evrópusambandið sem birtist í dag.

Þetta orð er bein þýðing á þýska orðinu lebensraum. Það er aldrei notað um annað en þá hugmynd nasista undir stjórn Hitlers að ryðja þjóðum Austur-Evrópu til að skapa rými fyrir Þjóðverja. Lebensraum er beinlínis nafn þessarar hugmyndafræði.

Að tala um Evrópusambandið og lebensraum í sömu andrá er það sem kallast reductio ad Hitlerum. Það hefur verið sagt að siðsamlegum rökræðum ljúki þega menn fara að bera andstæðinga sína saman við nasista. Lögmál Goodwins gæti líka átt við í þessu tilfelli.

Svo er það indíánalíkingin sem er líka notuð í greininni. Hún kemur úr annarri útrýmingarherferð, í þessu tilviki ofsóknum bandarískra landnema á hendur frumbyggjum Ameríku. Við skulum vona að ESB fari ekki að drepa fólk á Íslandi.

Ögmundur talar í framhaldi af þessu um glerperlur- og eldvatn.

Eru líkur á því að Evrópusambandið færi okkur alls kyns hégóma og óþarfa og þá hugsanlega áfengi líka – eða hefur íslenska þjóðin ekki verið alveg fullfær um neyslufyllerí sitt og reyndar staðið flestum ef ekki öllum þjóðum Evrópu framar í dýrkun á alls kyns skrani?