Í frönskum fjölmiðlum eru uppi vangaveltur um að Eva Joly sé líklegur frambjóðandi í forsetakosningum í Frakklandi árið 2012.

Hún situr nú á Evrópuþinginu fyrir græningja sem buðu fram undir heitinu Europe Ecologie, hún og Daniel Cohn-Bendit, gamli stúdentaforinginn, unnu þar mikinn sigur.

Græningjar telja sig þurfa sterkan kandídat fyrir forsetakosningarnar eftir tvö ár og þá er nafn Joly helst nefnt.

Kosningarnar eru í tveimur umferðum, í þeirri fyrri er kosið milli nokkurs fjölda frambjóðenda, en í þeirri síðari er kosið milli tveggja efstu. Það eru yfirleitt frambjóðendur hægri aflanna og sósíalista, þótt ekki sé það einhlítt. Í kosningunum 2002 komst þjóðernissinninn Le Pen í aðra umferð.

En frambjóðendurnir fá mikla athygli í fjölmiðlum, og til þess er leikurinn gerður, fremur en að líklegt sé að Joly yrði kosin forseti.

Nicolas Sarkozy forseti verður sjálfsagt áfram frambjóðandi hægri aflanna, en hann á pólitískt í vök að verjast. Meðal hugsanlegra frambjóðenda sósíalista er Dominique Strauss-Kahn, forstjóri Alþjóða gjadeyrissjóðsins. Hann hefur forskot á Sarkosy í skoðanakönnunum.

Þetta gætu orðið kosningar með nokkuð fjölþjóðlegt yfirbragð. Faðir Sarkozys var ungverskur aristókrati, Strauss-Kahn er af gyðingaættum en ólst upp í Marokkó, en Joly er, eins og allir vita, norsk að uppruna.