Eftir flokksráðsfund VG er sagt að stjórnarsamstarfið sé ekki í hættu. Það eru greinilega ekki allir í VG sem móðgast yfir þeim orðum Jóhönnu að samstarfið sé eins og að smala köttum.
Jóhanna er ekki orðhög kona. Þetta eru hérumbil fleygustu orð sem hafa heyrst úr munni hennar – og skal ekki gera lítið úr því.
En staðreyndirnar tala sínu máli.
Eftir flokksráðsfundinn segir Guðfríður Lilja Grétarsdóttir að ekkert liggi á að gera breytingar í stjórnarráðinu – sem þó hafa verið ræddar fram og aftur og er kveðið á um í stjórnarsáttmála.
Og Mogginn hefur eftir Ásmundi Einari Daðasyni:
„Ásmundur Einar Daðason, þingmaður VG…fullyrðir að fyrir forsætisráðherra vaki að veikja stöðu landbúnaðar og sjávarútvegs áður en aðildarviðræður við ESB hefjist af fullum krafti.“
Þetta eru stór orð – þingmaður úr stjórnariðinu segir að stjórnin sem hann styður sé vísvitandi að veikja atvinnuvegina í landinu.
Flestir í stjórnarliðinu vita þó hversu mikið er í húfi. Þarna hafa vinstriflokkarnir tveir fengið tækifæri til að stjórna landinu heilt kjörtímabil. Ef það klúðrast, er langt þangað til slíkt tækifæri kemur aftur og það mun varpa skugga yfir vinstri vænginn í langan tíma.
En svo er spurningin hvort sé yfirleitt hægt að halda áfram í þrjú ár í viðbót.
