Stöðugleikasáttmálinn er skrítinn skepna og stundum finnst manni hann varla vera meira en orðin tóm. Það er varla hægt að segja að staðið hafi verið við fyrirheit um atvinnuppbyggingu – og eftir lög og hótanir um lagasetningu á kjaradeilur má í raun segja að verkfallsréttur gildi varla lengur í þessu landi.
En á sínum tíma var sáttmálanum lýst sem miklum sigri fyrir ríkisstjórnina. Einn aðili hans eru náttúrlega Samtök atvinnulífsins sem hafa talsverðan áhuga á því að koma stjórninni frá.
En það er spurning hvað ríkisstjórnin gaf eftir. SA, með LÍÚ innanborðs, virðast líta svo á að samningurinn heimili ekki minnstu breytingar á fiskveiðistjórnunarkerfinu.
Eða annað er ekki að skilja á Vilhjálmi Egilssyni sem var í mikilli geðshræringu í gær vegna nokkur hundruð tonna af skötusel sem Alþingi hefur samþykkt að megi úthluta til veiða gegn heldur hóflegu gjaldi.
