Steingrímur J. mærir krónuna, segir hana hafa þjónað Íslendingum vel.

En það er samt spurning hversu hjálpleg hún hefur reynst launþegum þessa lands.. Kjaraskerðingin sem fylgdi hruni hennar á ekki sinn líka á Íslandi.

Gylfi Arnbjörnsson forseti ASÍ mótmælir Steingrími og kallar krónuna brennuvarg.

„Er formaður Vinstri Grænna að hlakka yfir því að samkeppnisstaða íslenskra fyrirtækja hafi verið bætt með því að lækka laun hér á landi um helming mælt í evrum,“ skrifar Gylfi.

Og ennfremur:

„Gerir ráðherrann sér ekki grein fyrir því að fjármálakreppan var vandamál bankamanna og útrásarvíkinga – en gjaldeyriskreppan sem kom í kjölfarið er rótin að vanda almennings? Almenningur í þessu landi hefði alveg getað lifað af fall bankanna – og trúlega grátið krókudílatárum í kjölfarið – en gengisfelling launa okkar og eigna mun taka okkur áratugi að leiðrétta! Þó þessi brennivargur hjálpi til tímabundið er mjög vafasamt að afhenda honum aftur kyndil okkar framtíðar.“