Forvitnileg er skoðanakönnun sem gefur til kynna að 80 prósent Íslendinga séu andvíg því að Jóhannes í Bónus fái að kaupa hlut í Högum.

Sumir hafa lifað í þeirri trú að Jóhannes sé alveg ómissandi fyrir þetta fyrirtæki. Að varla sé hægt að stunda verslun á Íslandi nema Jóhannes sé aðalgæinn.

Lengi vel var því haldið að fólki að Jóhannes og Jón Ásgeir væru eins konar Hróar Hettir sem sæktu að vondum kerfiskörlum úr sínum Skírisskógi.

Svo urðu þeir sjálfir kerfið. Náðu einokunarstöðu á íslenskum markaði. Þeir fluttu úr skóginum inn í kastala fógetans. Síðar kom svo í ljós að einu hæfileikar þeirra á sviði fjármála fólust í því að slá lán og búa til flóknar fléttur í kringum eignarhald sitt á fyrirtækjum.