Í Kiljunni í kvöld verður fjallað um tónlistarbækur sem koma út nú fyrir jólin. Þetta eru ævisögur Gylfa Ægissonar, Vilhjálms Vilhjálmssonar, Magnúsar Eiríkssonar, Guðmundar „Papa Jazz“ Steingrímssonar og bókin 100 bestu plöturnar.

Tónlistarmennirnir og poppfræðingarnir Óttarr Proppé og Gunnar Lárus Hjálmarsson segja undan og ofan af þessum bókum.

Í þættinum verður rætt við Guðberg Guðmundsson, en hann hefur skrifað bókina Þjófur, fíkill, falsari, sjálfsævisögu síbrotamanns. Guðberg hefur eytt tuttugu árum af ævi sinni í fangelsi, hér heima, í Þýskalandi, Bandaríkjunum og Hollandi, en er nú laus undan glæpum og vímufíkn.

Við hittum Jón Karl Helgason í Unuhúsi og ræðum við hann um bók sem hann hefur skrifað um einn af fyrri eigendum hússins, Ragnar Jónsson í Smára. Bók Jóns er að hluta til skrifuð út frá myndinni sem birtist hér að ofan, en hún sýnir Íslendinga í hádegisverði í Stokkhólmi daginn sem Halldór Laxness tók við Nóbelsverðlaununum. Þarna má sjá nokkra helstu menningarjöfra Íslands frá því um miðbik síðustu aldar: Halldór, Sigurð Nordal, Jón Helgason og Ragnar í Smára, auk Svíans Peters Hallberg.

Einnig segjum við lauslega frá bókum sem eru tilnefndar til Íslensku bókmenntaverðlaunanna.

Kolbrún og Páll fjalla um Horfðu á mig, nýja glæpasögu eftir Yrsu Sigurðardóttur, Gæsku eftir Erík Örn Norðdahl, Heim til míns hjarta eftir Oddnýju Eir Ævarsdóttur og Paradísarborgina eftir Óttar Martin Norðfjörð.