Ekki skal ég gera lítið úr því að DeCode sé merkilegt fyrirtæki og Kári Stefánsson mikill frumkvöðull.

Og það er óskandi að starfsemi fyrirtækisins verði áfram á Íslandi. Ég er viss um að innan fyrirtækisins hefur verið unnið ágætt vísindastarf.

En nú er staðan sú að þeir sem á sínum tíma keyptu hlutabréf í DeCode hafa tapað öllu.

Og þá rifjast upp ástandið hér á gráa markaðnum á sinni tíð.

Þegar var látið eins og þeir sem ekki keyptu í DeCode væru vitleysingar; frasinn var að mesta áhættan væri að kaupa ekki. Það var alvöru fjöldahystería.

Undir þetta ýttu bankamenn, stjórnmálamenn og fjölmiðlar.

Þeir sem andæfðu voru kallaðir hælbítar.

Bak við þetta voru Kári og aðstoðarforstjóri hans á þeim tíma, maður að nafni Hannes Smárason.

Þetta var eitt af stórum skrefum sem voru tekin í átt til græðgisvæðingar Íslands, og þaðan liggur leiðin beint í hrunið á síðasta ári. Sjúkdómsmerkin voru greinileg; hlutabréfamarkaður sem auðvelt var að manípúlera, meðfærilegir stjórnmálamenn og fjölmiðlar. og þjóð sem var tilbúin að láta plata sig.