Árni Þór Sigurðsson þingmaður, einn nánasti trúnaðarmaður Steingíms J., ræðst harkalega til atlögu við Gylfa Arnbjörnsson, forseta ASÍ, á heimasíðu sinni.

Minnir á þegar hann var baulaður niður á útifundi á Austurvelli síðastliðinn vetur og spyr hver hafi veitt honum umboð til að stjórna þjóðinni?

Segir svo að Gylfi gangi erinda auðvaldsins:

„Engu að síður telur þessi sami forseti ASÍ sig þess umkominn að setja stjórnvöldum skilyrði fyrir aðkomu samtaka launafólks að uppbyggingu íslensks samfélags úr rústum nýfrjálshyggjunnar.  Væri það ekki í frásögur færandi ef hann væri að krefjast þess að hagsmunir alls almennings yrðu hafðir að leiðarljósi, að samfélagið yrði byggt upp á samfélagslegum forsendum og lögmálum frjálshyggjunnar, sem hrundi sl. haust, yrði varpað á öskuhauga sögunnar.  En því er ekki að heilsa, því miður.  Nú er eins og fátt komist að í sálu forsetans en hagsmunir stórfyrirtækja, fjármagnsins, auðvaldsins…  Öðru vísi mér áður brá!

Hver valdi Gylfa Arnbjörnsson til að stjórna málefnum þjóðarinnar?  Var hann í framboði í nýliðnum þingkosningum?  Hversu mörg atkvæði hlaut hann?  Framganga hans í tengslum við endurreisn íslensks efnahags- og atvinnulífs og stöðugleikasáttmálann hlýtur að kalla á spurningar og svör af þessum toga.  Vill hann frekar meiri niðurskurð almannaþjónustu eða meiri skattahækkanir á launafólk en að atvinnureksturinn (þmt. orkugeirinn) leggi sittlítið eitt af mörkum til samfélagsþjónustunnar?  Hverra hagsmuna er hann að gæta?“