Gisele sem verður fertug á mánudaginn tilkynnti það á samfélagsmiðlum í dag að í stað þess að vera með stórt partí í miðju samkomubanni vilji hún heldur gefa aftur til samfélagsins. „Eins og sum ykkar vita á ég afmæli 20. júlí. Og þetta er ekkert venjulegur afmælisdagur! Ég trúi ekki að ég sé að verða fertug!,“ sagði Gisele og bætti við: „Mér líður eins og nýr kafli í lífi mínu sé að hefjast og ég vil fagna honum með því að gera eitthvað þýðingarmikið svo ég hef ákveðið að gróðursetja 40.000 tré. Ég hef gróðursett tré fyrir ýmis málefni í gegnum árin og mér finnst það vera besta leiðin fyrir mig til að gefa aftur til móður jarðar.“
Upprunalega ráðagerðin fólst í því að ferðast til heimalandsins Brasilíu til að gróðursetja trén í regnskógum Amazon en vegna Covid og ferðatakmarkanna varð hún að hætta við það. Hún ákvað að fá líka fleiri með sér í lið til að ná markmiðinu og fjölskylda og vinir ætla að gróðursetja tré í stað þess að gefa henni afmælisgjöf.
Gisele er gift NFL leikmanninum Tom Brady og saman eiga þau tvö börn. Fjölskyldan er meðvituð um umhverfið og Gisele segir alla á heimilinu eiga sína eigin margnota drykkjarflösku og þau reyni almennt að nota lítið plast og noti fjölnota innkaupapoka í búðarferðum. Það kemur því ekki á óvart að Tom, Benjamin og Vivian tóku vel í þetta uppátæki fyrirsætunnar og eru dugleg að hjálpa henni við gróðursetninguna.
