Mikil ólga er í Bretlandi eftir að gefið var út að eftir 24. júlí yrði íbúum skylt að ganga með andlitsgrímur í verslunum. Mörgum finnst um gífurlega íþyngjandi ráðstafanir að ræða. Aðrir hins vegar kjósa að sjá björtu hliðarnar og nýta sér tækifærið.
Nú hefur borið á því að breskir unglingar undir lögaldri nýti sér andlitsgrímur til að kaupa áfengi. Síðan sýna þeir frá athæfinu á vinsæla samfélagsmiðlinum TikTok.
Unglingarnir klæða sig upp sem eldri borgara og nota fölsuð skilríki til að kaupa áfengi, en rétt er að taka það fram að þetta athæfi er að sjálfsögðu ólöglegt.
Svo virðist vera sem að unglingar þar ytra hafi gert sér grein fyrir því að með því að hylja andlit sitt með andlitsgrímu þá sé auðveldara að blekkja starfsmenn í verslunum sem selja áfengi.
Sumir ganga enn lengra og klæða sig upp sem eldri borgara og brúka þá hárkollur, gleraugu og slæður í því skyni blekkja starfsmenn.
Andlitsgrímurnar hafa því skapað fordæmalaust tækifæri fyrir unglinga að versla sér áfengi með fölsuðum skilríkjum, eða hreinlega skilríkjum sem tilheyra einhverjum allt öðrum einstakling, þar sem andlit þeirra er hulið og erfitt fyrir starfsmenn að staðreyna að skilríki tilheyri þeim einstakling sem fyrir framan þá stendur.
