Leikarinn Dennis Quaid opinberaði það í síðasta mánuði að hann og Laura Savoie væru trúlofuð, aðeins fimm mánuðum eftir að þau sögðu frá sambandi sínu. 39 ára aldursmunur er á parinu – Dennis er 65 ára og Laura er 26 ára. Í viðtali við The Guardian segir leikarinn aldurinn engu máli skipta.
„Ég fór ekki út og leitaði uppi yngri konu. Maður ræður því ekki hverjum maður verður ástfanginn af. Ég verð ekki auðveldlega ástfanginn,“ segir leikarinn og bætir við að hann láti neikvæðar athugasemdir um ráðahaginn sem vind um eyru þjóta.
„Ég get ekki látið skoðanir nokkurra manneskja stjórna þessu. Ég hef verið kvæntur þrisvar sinnum og þetta er í síðasta sinn, ég veit það. Mér finnst eins og ég eigi raunverulegan maka í lífinu.“
Leikarinn segir að þau Laura muni ganga í það heilaga einhvern tímann á næstu ellefu mánuðum.
Dennis gekk fyrst í það heilaga árið 1978. Þ‘a kvæntist hann leikkonunni PJ Soles en þau skildu árið 1983. Árið 1991 gekk hann að eiga leikkonuna Meg Ryan og skildu þau áratug síðar. Svo kynntist Dennis þriðju eiginkonu sinni, Kimberly Buffington. Þau giftu sig árið 2004, skildu að borði og sæng árið 2016 og í ágúst í fyrra gekk skilnaðurinn endanlega í gegn.
Laura er í doktorsnámi við háskólann í Texas og útskrifast árið 2021. Hún útskrifaðist frá Pepperdine-háskólanum árið 2014 með hæðstu einkunn. Þegar hún sótti Pepperdine var hún í sambandi með leikaranum og Entourage-stjörnunni Jeremy Piven. Hún hefur ekki verið gift áður.
