Í Lögbirtingablaðinu í dag er sómalskur karlmaður kvaddur til að mæta fyrir Héraðsdóm Reykjaness og hlýða á ákæru sem gefin hefur verið út á hendur honum. Er maðurinn ákærður fyrir að hafa í Flugstöð Leifs Eiríkssonar framvísað nafnskírteini sem á var annað nafn en hans eigið. Samkvæmt því nafnskírteini var maðurinn 18 árum eldri en hann er í raun og veru.

Fram kemur að málið verði tekið fyrir í mars næstkomandi.

Maðurinn er fæddur 1994. Hann er ákærður fyrir misnotkun skjals mað því að hafa í desember 2024 í brottfararsal Flugstöðvarinnar framvísað sem vegabréfi, í blekkingarskyni, við landamæravörð og lögreglumenn hollensku nafnskírteini. Var skírteinið á öðru nafni og samkvæmt því var viðkomandi fæddur 1976, 18 árum eldri en hinn ákærði er í raun og veru.

Hver tilgangurinn með þessu athæfi kann að hafa verið kemur ekki fram í tilkynningunni. Þess er krafist að maðurinn verði dæmdur til refsingar og greiðslu alls sakarkostnaðar. Minnt er einnig á að ef maðurinn mæti ekki fyrir dóm verði það metið svo að með fjarveru sinni sé hann að viðurkenna brot sitt.

Fólk er yfirleitt ekki kallað fyrir dóm og því birt ákæra í Lögbirtingablaðinu nema að ekki hafi tekist að hafa uppi á viðkomandi til að birta honum ákæruna og kalla hann fyrir dóm. Það virðist því ekki vera vitað hvar maðurinn er niðurkominn.