Í Facebook-hópi íbúa í miðborginni lýsir kona ófyrirleitnum þjófnaði úr verslun Extra við Hverfisgötu/Barónsstíg. Segir hún að starfsfólk hafi ekki stöðvað gerendur þar sem það áliti þá hættulega. Frásögnin er eftirfarandi:
„Varð vitni að furðulegu atviki í dag. Ég fór í Extra á Hverfisgötu. Þrír menn sem töluðu pólsku stóðu við strætóstöðina. Heyrði þá koma inn á eftir mér. Þeir tóku nokkra bakka með hakki og tróðu inn á sig og voru ekkert að fela það. Síðan gengu þeir út án þess að borga. Ég sagði afgreiðslufólkinu frá þessu. Það skipti sér ekki af mönnunum og sagði að þeir væru hættulegir. Þetta gerðist stundum. Af hverju skyldi verslunin ekki hafa öryggisvörð þarna frekar en að leyfa svona gaurum að komast upp með ógnarstjórnun? Starfsfólkið á ekki að þurfa að leggja sig í hættu í svona aðstæðum. Veit ekki hvort Lögreglan veit af þessu.“
Hjólahvíslarinn Bjartmar Leósson lýsir miklum þjófnaði úr verslun 10-11 við Hlemmtorg:
„Það er sópað út úr 10 11 Hlemmi í massavís. Og kjöt er vinsælt til að stela. Dýrt og ekki svo stórar pakkningar. Maður stoppaði mig eitt sinn á Laugaveginum og spurði hvort mig vantaði kjöt. Opnaði svo bakpoka smekkfullan af kjötpakkningum. Annan sá ég svo seinna í vesturbænum með búðarkerru fulla af kjöti. Báðir þessir menn voru í mikilli neyslu og rugli. Það er skuggalegt hvað er að gerast hér í borginni þegar kemur að þjófnuðum af ýmsu tagi.“
DV sendi fyrirspurn til verslunarstjóra Extra og spurði hvort búðarþjófnaður væri vandamál þar. Fréttin verður uppfærð ef svör berast.
DV sendi fyrirspurn vegna málsins til Extra á Barónsstíg og spurði hvort búðaþjófnaður væri mikið vandamál í versluninni. Eftirfarandi svar barst frá verslunarstjóra:
„Þetta er alveg rétt og þetta er stórt vandamál. Við vitum að það eru ákveðnir aðilar sem eru að stela og það hefur komið fyrir oftar en einu sinni og oftar en tvisvar að ráðist er á starfsmenn sem leggja sig fram við að stöðva þjófa. Við tilkynnum til lögreglu og sendum myndefni þegar að svona mál koma upp.“
