Hundurinn þinn er hugsanlega eldri en þú heldur – Vísindamenn við Kaliforníuháskóla segja að rannsókn þeirra hafi varpað ljósi á að það sé bara mýta að eitt æviár hunds svari til sjö mannsára. Rannsóknin sýndi fram á að eftir því sem hundar eldast, þá hægist á öldruninni. Þeir segja að fjögurra ára hundur sé eins og 52 ára manneskja en 12 ára hundur eins og 70 ára manneskja.
Hundar eru líka uppreisnargjarnir á unglingsárunum – Það er ekki bara fólk sem upplifir tilfinningarússíbana á unglingsárunum. Breskir vísindamenn hafa komist að því að hundar ganga í gegnum svipað ferli á unglingsárunum. Þeir rannsökuðu hversu hlýðnir 5 og 8 mánaða hundar eru og komust að því að þeir eru mun líklegri til að hunsa fyrirmæli þegar þeir eru á unglingsaldri.
Þeir skilja alveg hvað þú segir – Margir hundeigendur telja að hundurinn þeirra skilji það sem er sagt við þá. Þeir gætu haft rétt fyrir sér hvað þetta varðar. Vísindamenn við Emory háskólann komust að því að hundar búa yfir grundvallarskilning á orðum og geta greint á milli þekktra og óþekktra hugtaka og eru viljugir til að skilja hvað er verið að segja við þá.
Hundurinn þekkir rödd þína – Auk þess að þekkja orð, þá átta hundar sig á þegar nýr aðili talar. Vísindamenn við Sussex háskóla rannsökuðu getu hunda til að þekkja sama orðið þegar það er sagt af mismunandi fólki. Viðbrögðin við fyrirmælunum voru jákvæð. Þess utan gátu hundarnir greint mun á röddum fólks sem þeir þekktu fyrir og fólks sem þeir þekktu ekki.
Hundar skilja meira en orð – Í rannsókn, sem var birt í Frontiers in Psychology, kemur fram að húsbóndalausir hundar skilja þegar einhver bendir á eitthvað og skiptir þá engu þótt þeir hafi ekki fengið neina þjálfun áður. Vísindamenn segja að þetta bendi til að hundar geti skilið flókin fyrirmæli með því einu fylgjast með fólki.
Að eiga hund er gott fyrir heilsuna – Það er oft talað um að gæludýr komi mjög að gagni hvað varðar andlega vellíðan eigenda þeirra, dragi úr kvíða og einmanaleika. En vísindamenn benda á að minna sé rætt um þau jákvæðu áhrif sem hundar hafa á líkamlega heilsu fólks. Út frá gögnum um 3,8 milljónir manna, sáu vísindamenn að það að eiga hund eykur líkurnar á að hjartað og blóðrásin séu í betra standi, sérstaklega hjá þeim sem hafa lifað hjartaáfall og heilablóðfall af og búa aleinir.
