Freyr Alexandersson þjálfari Kortrijk tæki upp tólið ef KSÍ hefði áhuga á samtalinu, honum finnst hins vegar umræðan um Age Hareide ósmekkleg.
Hareide er að undirbúa landsliðið fyrir mikilvægan landsleik í kvöld gegn Wales þar sem mikið er undir.
„Það er ekkert sem bendir til þess að þetta hafi verið síðasti leikur minn með Kortrijk, mér finnst satt best að segja. Ég hef orðið var við það, að mitt nafn og Arnars (Gunnlaugssonar) eru tengd við landsliðið. Ég ætla að leyfa mér að segja það, ég verð aldrei á þeim stall að ég muni ekki tala við KSÍ ef þeir vilja tala við mig. Ef þeir tala við mig, þeir fjárfestu í mér og gáfu mér tækifæri. Ég skulda þeim, þetta er stórkostlegt starf,“ sagði Freyr í Chess after Dark.
Hann segir hins vegar að Hareide eigi skilið vinnufrið. „Þessi umræða rétt fyrir landsleiki, það er klásúla hjá Age eins og komið hefur fram. Mér finnst umræðan ósanngjörn og ósmekkleg, þið fáið mig ekki til að svara hvort ég hafi áhuga.“
KSÍ mun fara yfir mál Hareide eftir leikinn í kvöld þegar uppsagnarákvæði í samningi hans verður virkt. „Það er stjórn KSÍ sem tekur þessa ákvörðun í samráði við Age Hareide, hann er búin að gera fína hluti. Ég veit ekki allt, ég hef engan áhuga á að svara því hvort ég hafi áhuga eða ekki.“
„Ég hef ekki heyrt eitt einasta orð frá KSÍ.“
