Íslenska karlalansdsliðið vann sinn annan leik í Þjóðadeildinni í kvöld en leikið var við Svartfjallaland ytra.
Fyrri leikur þessara liða fór fram á Laugardalsvelli þar sem okkar menn höfðu betur með tveimur mörkum gegn engu.
Það sama var upp á teningnum í kvöld en Ísland vann 2-0 sigur og er nú með sjö stig í riðli fjögur í B deildinni.
Orri Steinn Óskarsson skoraði fyrra mark Íslands með laglegu skoti og ekki löngu seinna bætti Ísak Bergmann Jóhannesson við öðru.
Age Hareide, landsliðsþjálfari, var nokkuð sáttur eftir leikinn en viðurkennir að frammistaðan hafi ekki verið of heillandi.
,,Fótboltinn er stundum skrítinn, við áttum skilið meira en eitt stig gegn bæði Tyrklandi og Wales,“ sagði Hareide við Stöð 2 Sport.
,,Við spiluðum ekki vel í dag en strákarnir börðust og komu sterkir inn í seinni hálfleik og skiptingarnar hjálpuðu okkur. Ísak kom sterkur inn, ungur strákur sem skoraði mark og er að standa sig vel í 2. Bundesligunni.“
,,Við þurfum stundum að róa leikinn niður og þetta getur tengst andlegum þætti. Hlutirnir líta vel út þegar við mætum til leiks en svo er völlurinn slæmur og við þurftum að notast við langa bolta en erum ekki að vinna þann seinni.“
,,Leikurinn við Wales verður mikilvægur, við getum náð öðru sætinu. Tyrkland hefur sannað það að þeir eru sterkasta liðið hingað til en við vitum að við getum unnið seinni leikinn gegn Wales.“
