Lögregla svarar ekki til um það hvort fylgst sé með tilteknum einstaklingum sem eru grunaðir um tengsl við hryðjuverkasamtök.

Þetta segir Finnbogi Jónasson, sem gegnir tímabundið starfi aðstoðaryfirlögregluþjóns hjá greiningardeild ríkislögreglustjóra, í samtali við Morgunblaðið í dag.

„Al­mennt get­um við ekki svarað því hvort fylgst sé með ákveðnum ein­stak­ling­um: Við reyn­um hins veg­ar að fylgj­ast með eft­ir bestu getu því um­hverfi sem hef­ur áhrif á hættumat grein­ing­ar­deild­ar, bæði vegna skipu­lagðrar brot­a­starf­semi og hryðju­verk­a­starf­semi,“ seg­ir Finn­bogi.

Í frétt blaðsins er vísað í viðtal Stefáns Einars Stefánssonar, þáttastjórnanda Spursmála á mbl.is, við Svandísi Svavarsdóttur á dögunum, en þar var upplýst að Palestínumaður að nafni Abd al-Rahman al-Zac væri með tengsl við palestínsku hryðjuverkasamtökin Íslamska Jíhad. Maðurinn dvelur enn hér á landi þrátt fyrir að hafa verið synjað um alþjóðlega vernd.

Í þættinum birtist mynd af Abd í líkfylgd hryðjuverkaleiðtogans Bahaa Abu el-Atta sem var drepinn í loftárás árið 2019. Gekk hann þar fremstur í flokki með steyttan hnefa.