KA er bikarmeistari í karlaflokki eftir 2-0 sigur á Víkingi R. í úrslitaleik bikarsins á Laugardalsvelli í dag. Líklega átti fyrra markið sem var skorað aldrei að standa.

Leikurinn var jafn stærstan hluta leiksins, bæði lið fengu færi og bæði lið áttu sterkt tilkall til þess að fá vítaspyrnu í leiknum.

Fyrra mark leiksins kom á 37. mínútu en það er á reiki hver skoraði markið en líklega endar það sem sjálfsmark hjá Oliver Ekroth varnarmanni Víkings.

Líklega hefði markið aldrei átt að senda því Ívar Örn Árnason fékk boltann í höndina áður en hann kom honum að marki, Rodri virtist svo snerta boltann áður en Ekroth kom við hann.

Víkingar reyndu eftir þetta að jafna leikinn og fengu nokkur góð færi en það dugði ekki til. Það var svo á 99 mínútu leiksins sem Dagur Ingi Valsson skoraði annað mark leiksins og tryggði sigurinn.

Sögulegur sigur KA sem er bikarmeistari í fyrsta sinn í sögu félagsins. Með þessu hefur KA tryggt sér sæti í Evrópukeppni á næsta tímabili sem er frábært afrek.

Sigurganga Víkings á Laugardalsvelli er einnig lokið en liðið hafði unnið bikarinn fjögur skipti í röð en nú fer bikarinn norður.

Ívar vill fá markið skráð á sig. Sérfræðingarnir í stúdíóinu segja þó að Ívar hafi fengið boltann í höndina og að markið hefði ekki átt að standa. pic.twitter.com/MHkPBJ4oLK

— RÚV Íþróttir (@ruvithrottir) September 21, 2024