Kristín var í beinni útsendingu í aukafréttatíma Sjónvarps í hádeginu þar sem hún fór yfir málið.
Sjá einnig: Mjög mikilvægt fyrir íbúa Suðurnesja að spara heita vatnið – Svartasta sviðsmyndin orðin að veruleika
„Þetta er því miður vond sviðsmynd sem er að raungerast hér og afar sorgleg tíðindi að þessi mikla æð sé farin,“ sagði Kristín.
Aðspurð hver þróunin getur orðið segir Kristín að hrauntungan haldi áfram að flæða til vesturs.
„Hún er búin að valda miklum skaða nú þegar. Það er líklegt að hraun haldi áfram að safnast saman þarna vestan við þar sem þessi lína liggur, þessi háspennulögn. Skaðinn er skeður, þetta eru mjög vondar fréttir,“ segir Kristín en Víðir Reynisson, sviðsstjóri hjá Almannavörnum, sagði í fréttum Stöðvar 2 í hádeginu að rafmagns- og kaldavatnslagnir séu líka í hættu.
Sjá einnig: Víðir segir að rafmagnið og kalda vatnið séu líka í hættu
Kristín sagði að hraunrennslið í morgun hafi verið óvenju hratt og telur hún að hraunið haldið áfram að teygja sig í vestur og til suðvesturs með fram varnargarðinum sem þar er.
Sjálf telur Kristín allar líkur á að gosið verði ekki mjög langlíft og standi tiltölulega stutt yfir, eins og gosin í desember og janúar. Líklegast sé að gosinu verði lokið eftir nokkra daga.
Í nýrri Facebook-færslu Eldfjalla- og náttúruvárhóps Suðurlands kemur fram að mjög hafi dregið úr framleiðslu í gosinu síðasta klukkutímann.
„Mikill munur er á strókavirkninni og hefur hún nær alveg fallið niður á stórum hluta gossprungunnar. Meðfylgjandi myndir voru teknar með um 50 min millibili og sýna breytinguna vel. Samhliða þessu ætti ekki langur tími að líða þar til breytinga verður vart á hrauntungunni sem valdið hefur öllu tjóninu í dag. Haldi þetta áfram er ljóst að goshegðunin er mjög lík því sem sást í gosunum tveimur í desember og janúar. Mikill kraftur á fyrstu klukkutímunum, en eftir það dregur hratt úr þeim og goslok verða innan örfárra daga.“
