Hraun rennur í átt að Grindavíkurvegi en þrátt fyrir það eru engir innviðir taldir vera í hættu vegna eldgossins sem hófst á Reykjanesskaga í morgun. Þetta sagði Víðir Reynisson, sviðsstjóri hjá Almannavörnum, í aukafréttatíma RÚV í morgun.

„Ekki eins og staðan er núna. Hraunstraumurinn rennur þannig að það er engin bráðahætta af þessu,“ sagði Víðir og bætti við að allt virtist vera í lagi í Grindavík og þar hafi enginn verið þegar gosið hófst.

„Þetta er eins góð staða og hægt var að óska sér í þessum atburði,“ sagði hann.

Víðir telur að mögulega muni reyna á varnargarða sem reistir hafa verið undanfarnar vikur og mánuði. „Það er alveg möguleiki og fer eftir hversu lengi þetta gos stendur yfir. En eins og staðan er núna þá þarf að gjósa í dálítinn tíma í þessari mynd til að það muni reyna á þá.“

Víðir segir að verktakar séu komnir að skarðinu í varnargarðinum við Svartsengi við Grindavíkurveg. Efni verði ýtt að veginum en því ekki lokað fyrr en hætta er á að hraun renni þangað.

„Þetta er svipað og við gerðum í gosinu 18. desember þar sem við þrengdum þetta skarð og vera undirbúin að loka því ef nauðsyn krefur. Það er ekki þörf á því eins og staðan er núna.“