Eftir mjög óvænt tap gegn Middlesbrough í fyrri leiknum í undanúrslitum enska deildarbikarsins, þá bauð liðið upp á sýningu á Stamford Bridge í kvöld.

Boro varð fyrir því óláni að skora sjálfsmark eftir fimmtán mínútna leik en Enzo Fernandez, Axel Disasi og Cole Palmer bættu við mörkum áður en fyrri hálfleikur var á enda.

Palmer skoraði einnig fimmta mark leiksins áður en Noni Madueke bætti við sjötta markinu og þar við sat hjá Chelsea en Morgan Rogers lagaði stöðuna fyrir gestina í lokin. 6-1 sigur staðreynd.

Chelsea vann því samanlagt 6-2 sigur og er komið með farmiða á Wembley í næsta mánuði.

Það kemur í ljós á morgun hvort það verði Fulham eða Liverpool sem mæta þeim í úrslitum en Liverpool er í góðri stöðu fyrir seinni leikinn.