Eins og fram kom í fréttum í gær þá bendir ýmislegt til að landris sé hafið á nýjan leik á Reykjanesskaga og að kvika sé farin að safnast fyrir undir Svartsengi á nýjan leik. Freysteinn Sigmundsson, jarðeðlisfræðingur við Háskóla Íslands, segir erfitt að setja til um hvenær dragi aftur til tíðinda á skaganum en mjög mikilvægt sé að fylgjast með framvindu mála næstu daga.

Mbl.is skýrir frá þessu og hefur eftir Freysteini að það mikilvægasta nú sé að fylgjast vel með atburðarásinni, leggja mat á kvikuflæðið og leggja mat á hvað þurfi hugsanlega til að koma nýju gosi af stað.

Hann sagði að jarðskorpan hegði sér ekki það reglulega og ekki sé vitað með vissu hvar mörkin liggja varðandi það að nýr atburður hefjist.

Hann sagði að í hans huga sé líklegasta atburðarásin kannski að eitthvað af kviku þurfi að safnast fyrir áður en það gýs á nýjan leik.