Lögmaðurinn Jón Steinar Gunnlaugsson og prófessorinn Hannes Hólmsteinn Gissurarson skutu föstum skotum á víxl í dag, en tilefni ágreinings þeirra var grein sem Hannes ritaði og birti á heimasíðu sinni og í Morgunblaðinu. Gengu gífuryrðin á milli og spilaði ritstjóri Moggans, Davíð Oddsson, stórt hlutverk í deilunum.
Grein Hannesar fjallaði um mælanleg mistök í samhengi við embættisverk ríkisstjórna Íslands í gegnum tíðina. Minntist fræðimaðurinn á Icesave-málið og sjálfstæðisbaráttu Íslendinga um aldamótin 1900 þegar dr. Valtýr Guðmundsson tapaði kosningabaráttu fyrir Hannesi Hafstein hvað varðaði heimastjórnaráðherra, en Valtýr hafði beitt sér fyrir ráðherra sem búsettur væri í Kaupmannahöfn á meðan Hannes barðist fyrir ráðherra með búsetu hér heima.
Jón Steinar taldi ljóst að Hannesi hefði verið nær að líta á embættisverk Davíðs Oddssonar, þegar hann var forsætisráðherra. Þá sérstaklega þegar Davíð vildi með lögum takmarka heimildir manna til að eiga eignarhlut í fjölmiðlum og hins vegar þegar Davíð vildi með lögum láta íslenska ríkið ábyrgjast gífurlegar skuldir Íslenskrar erfðagreiningar á erlendri grundu.
Viðraði Jón Steinar þessa skoðun í athugasemd á síðu Hannesar, en þeirri athugasemd eyddi fræðimaðurinn út sem varð til þess að lögmaðurinn ákvað að birta ummæli sín á sinni eigin síðu ásamt vænni pillu.
Um áðurnefnd meint mistök Davíðs sagði Jón:
„Í hvorugu þessara tilvika hafði hann komið vilja sínum fram vegna þess dómgreindarbrests sem hann sýndi með tillögugerðinni og allir sáu. Í annað skiptið vildi hann þagga niður í mönnum sem hann taldi hafa talað illa um sig. Í hitt skiptið vildi hann misnota ríkissjóð í þágu vinar síns Kára Stefánssonar. Þessi dæmi hlyti hlutlaus fræðimaðurinn að nefna til sögunnar.“
Jón Steinar segir það ótrúlega framkomu af Hannesi að hafa eytt athugasemdinni út, og ljóst sé að hetjudýrkun fræðimannsins til ritstjóra Morgunblaðsins sé gengin úr hófi fram.
„Nú kemur í ljós að Hannes hefur eytt athugasemdum mínum um þetta af síðu sinni. Þetta er ótrúleg óskammfeilni. Þeir sem til þekkja vita að hann dáir Davíð Oddsson og telur hann nánast guðlegan. En er þetta ekki of langt gengið hjá prófessornum? Aðdáun hans á Davíð virðist vera honum meira virði en fræðimannsheiður hans sjálfs.“
Með þessu hafi Hannes Hólmsteinn lýst því yfir að ekki sé hægt að taka skrif hans og kenningar alvarlega því hann taki sína eigin hagsmuni, og vina sinna, fram yfir málefnalegan heiðarleika.
„Ekki bara stundum heldur alltaf“
Hannes Hólmsteinn svarar Jóni í athugasemd og sagði einfalt mál að útskýra hvers vegna athugasemdinni var eytt.
„Það var til þess að þú yrðir þér ekki til skammar, því þú hafðir algerlega misskilið Fróðleiksmolann. Hann var ekki um mistök almennt eða ágreining um málefni, heldur um mælanleg mistök, sannanleg mistök.“
„En þú vilt auðvitað ekki viðurkenna misskilning þinn; heldur halda áfram að þvarga um þetta og það á netinu, fyrir allra augum“
Eins og í góðum rifrildum þá ákvað Jón að gefa Hannesi ekki síðasta orðið.
„Ég kenni í brjósti um þig Hannes. Einu sinni vorum við samherjar en þú sagðir í reynd upp kunningsskap við mig til að þóknast guði þínum.“
