Nafninu á Sambandsdeild UEFA verður breytt eftir komandi leiktíð. UEFA segir frá þessu í tilkynningu.
Keppninni var komið á laggirnar fyrir síðustu leiktíð og er eins konar C-Evrópukeppni á eftir Meistaradeildinni og Evrópudeildinni.
Roma varð fyrsti meistari keppninnar vorið 2022 og í ár vann West Ham keppnina.
Opinberlega ber keppnin heitið Europa Conference League en verður nafninu breytt í UEFA Conference League eftir komandi leiktíð.
„Eftir rannsókn höfum við komist að því að það að fjarlægja „Europa“ úr nafninu muni gera keppninni kleift að þróast enn frekar og að hún muni frekar standa ein og sér,“ segir í tilkynningu UEFA, en Evrópudeildin heitir auðvitað Europa League.
Íslensk lið leyfa sér að dreyma um að komast í Sambandsdeildina. Víkingur R. og KA taka þátt í undankeppni hennar í ár.
