Í lok sumars 2022 lauk Veitingafélagið ehf. yfirtöku á rekstri veitingakeðjunnar Mandí. Mandí býður upp á mið-austurlenskan mat á þremur stöðum á höfuðborgarsvæðinu; í Hæðasmára 6, Faxafeni 9 og Veltusundi 3b auk þess að reka öfluga veisluþjónustu. Veitingafélagið ehf, sem er í eigu Óla Vals Steindórssonar, á og rekur í dag níu skyndibita- og veitingahús; undir merkjum Hlöllabáta á Bíldshöfða, Bústaðavegi, Smáralind og í hraðhöll Orkunnar Hagasmára 9; Burgeis í hraðhöll Orkunnar Hagasmára 9, þá er Bankinn Bistro (áður Barion Mosó) í Mosfellsbæ og Mandi Faxafeni, Hæðarsmára og Veltusundi.

„Á því ári sem við höfum verið við stjórnvölinn höfum við öðlast mikla trú á Mandi og sérstöðu þess á skyndibitamarkaði og aðlagað reksturinn við aðra staði sem við rekum. Við höfum þróað spennandi vörulínu undir merkjum Mandi sem fljótlega fer í sölu. Einnig höfum við sett upp veitingavagn sem hægt er að panta í veislur líkt og við höfum verið að bjóða uppá með Hlöllavagninn með góðum árangri,“ er haft eftir Jóni Friðriki Þorgrímssyni, framkvæmdastjóra Veitingafélagsins ehf. í fréttatilkynningu.

Segir Jón Friðrik að uppgangur félagsins hafi verið mikill síðastliðið árið en félagið hafi farið úr því að eiga og reka tvö vörumerki á fjórum stöðum í fjögur vörumerki á níu stöðum.

„Það eru spennandi tímar framundan þar sem við erum hvergi nærri hætt,“ segir Jón Friðrik.