Rætt var um hinn magnaða Adam Ægi Pálsson leikmann Vals í Þungavigtinni í dag. Adam hefur verið í góðu formi eftir að Valur keypti hann frá Víkingi í vetur.

Adam blómstraði á láni hjá Keflavík á síðustu leiktíð en Víkingur var tilbúið að selja hann og valdi Adam að fara í Val.

„Ég hef haft trú á honum í fjögur ár, eftir að hann sá mig æfa í World Class í Ögurhvarfi og sá mig æfa þar. Hann fékk blóð á tennurnar þar,“ sagði Mikael Nikulásson þjálfari KFA í þættinum.

Hann veltir því svo fyrir sér hvort Arnar Gunnlaugsson, þjálfari Víkings sjái ekki eftir því að hafa selt Adam. „Maður hugsar samt, sér Arnar ekki eftir því að hafa ekki gert meira með Adam Ægi,“ sagði Mikael og það taldi Ríkharð Óskar Guðnason næstum því öruggt.

„Hann var í Víkingi í vetur eftir tímabilið með Keflavík, núna er hann að springa út í Val og væri að gera það í Víking líka,“ segir Mikael.

Mikael segir að Adam hugsi bara um að vera góður í fótbolta og það virðist nú skila sér. „Hann er ekkert að vinna, hefur aldrei unnið. Er bara að vinna í þessu, það er enginn sem tekur þetta meira alvarlega í deildinni,“ sagði Mikael