Á morgun verður þingfest í Héraðsdómi Reykjavíkur mál sem héraðssaksóknari hefur höfðað gegn tveimur tvítugum mönnum, vegna sérstaklega hættulegrar líkamsárásar.

Um er að ræða atvik sem átti sér stað aðfaranótt laugardagsins 6. nóvember árið 2021. Er atvikinu lýst svo í ákæru:

„Gegn ákærðu báðum fyrir sérstaklega hættulega líkamsárás, með því að hafa í Hafnarstræti framan við veitingastaðinn Mandi Pizza í Reykjavík, í félagi, veist að X, ákærði A með því að sparka í bringu X og ákærði B með því að sparka í efri búk hans, en X féll í jörðina í kjölfar þessara sparka frá báðum ákærðu, og í framhaldinu stappaði ákærði B ofan á höfði X er hann lá varnarlaus á jörðinni og þá gerðu báðir ákærðu tilraun til að sparka í hann þar sem hann lá liggjandi á jörðinni, allt með þeim afleiðingum að hann hlaut hrufl á enni og hægra handarbaki, höfuðkúpubrot, andlitsbeinabrot ásamt mari í vinstri gagnaugaheilableðli með mildri blæðingu og opið sár í hársverði.“

Annar maðurinn er að auki ákærður fyrir minniháttar fíkniefnabrot, að hafa haft lítilsháttar af maihúana í fórum sínum.

Báðir mennirnir hafa áður komið við sögu í réttarkerfinu og fjölmiðlum. Annar þeirra var einn af þeim sem urðu fyrir árás hóps manna sem ruddust inn á næturklúbbinn Bankastræti Club í nóvember árið 2022. Hinn hlaut nýlega dóm fyrir að taka kynferðismök upp á myndskeið, samkvæmt frétt RÚV. Einnig voru þeir báðir ákærðir fyrir að veitast að manni við Kjarvalsstaði fyrir tveimur árum og neyða hann til að millifæra tæpar 900 þúsund krónur.