„Hef unnið með Brittany síðustu vikur og það vekur furðu þær hindranir sem lagðar eru fyrir hana til að hljóta starfsleyfi á Íslandi,“ segir Ragnar Freyr Ingvarsson læknir um mál hinnar kanadísku Brittany Gould.

Fjallað var um mál hennar í kvöldfréttum RÚV í gærkvöldi en Brittany, sem er lærður hjúkrunarfræðingur, hefur mætt ýmsum hindrunum við að sækja um starfsleyfi hér á landi.

Hún flutti til Íslands ásamt eiginmanni sínum í desember og sótti um svipað leyti um leyfi til að starfa hér sem hjúkrunarfræðingur. Nú, um fjórum mánuðum síðar, bíður Brittany enn og á meðan hefur hún einungis leyfi til að starfa sem aðstoðarmaður.

Í viðtali við RÚV lýsti Brittany því að hún hafi skilað til embættis landlæknis hátt í eitt hundrað blaðsíðum af gögnum. Gögnin eru svo send til Háskóla Íslands sem leggur mat á þau og ítrekað sé beðið um frekari gögn.

Mikil vöntun hefur verið á hjúkrunarfræðingum hér á landi og því kemur það sér illa þegar vel menntaðir einstaklingar í sínu fagi, líkt og Brittany, þurfa að bíða lengi skriffinnskunnar vegna.

Brittany útskrifaðist frá Háskólanum í Alberta árið 2015 sem er enn besti háskóli í heimi. Hún starfaði á einni stærstu bráðamóttöku Kanada eftir útskrift og er til að mynda sérhæfð í meðhöndlun á skotáverkum.

Ragnar Þór gerði mál hennar að umtalsefni á Facebook-síðu sinni í gærkvöldi þar sem hann sagði að gera þurfi Ísland meira aðlaðandi fyrir erlent starfsfólk – og íslenskt líka.

„Einhver fugl hvíslaði að mér að okkur vantaði hjúkrunarfræðinga til starfa! Hef unnið með Brittany síðustu vikur og það vekur furðu þær hindranir sem lagðar eru fyrir hana til að hljóta starfsleyfi á Íslandi. Þetta hlýtur að vera hægt að laga,“ sagði Ragnar Freyr.

DV freistaði þess að ná tali af Ragnari við vinnslu fréttarinnar en náði ekki sambandi við hann.

Í athugasemdum var hann spurður að því hvort ráða ætti hjúkrunarfræðing eða lækni sem talar ekki íslensku. Því svaraði Ragnar svona:

„Hún lærði hjúkrun. Hún lærir íslensku. Fjöldi heilbrigðisstarfmanna í dag talar ensku á meðan það er að læra íslensku. Við þurfum starfsfólk meira en við þurfum stafsetningarkunnáttu og íslenska málfræði!“