Spjótin standa á Vöndu Sigurgeirsdóttur, formanni KSÍ, eftir að í ljós kom að fullyrðingar hennar, um að Utanríkisráðuneytið hefði ekki talið neitt mæla gegn ferð KSÍ og karlalandsliðsins til Sádi-Arabíu þar sem leikinn var landsleikur við heimamenn, reyndust ekki halda vatni.
Þetta kom fram í frétt í nýjasta tölublaði Stundarinnar en þar sór ráðuneytið af sér að hafa gefið slíkar ráðleggingar og að fyrirspurn KSÍ hafi snúist um allt annað atriði.
KSÍ hefur legið undir mikilli gagnrýni fyrir að þiggja boð Sádi-Araba um heimsókn og landsleik gegn greiðslu. Hefur sambandið verið sakað um að hvítþvo heimamenn með hjálp knattspyrnunnar enda orðspor landsins varðandi mannréttindi ekki upp á marga fiska. Þá hefur sambandið neitað að gefa upp hversu há umrædd greiðsla var.
,,Við heyrðum í utanríkisráðuneytið á sínum tíma til að vita hvort að þar væri talið að eitthvað mælti gegn því að við spiluðum þennan leik. Svo var ekki,“ sagði Vanda í viðtali við Vísi í júní.
Vanda, sem heimsótti gestgjafa heimsmeistaramótsins í Katar á dögunum ásamt fríðu föruneyti, hefur ekki enn brugðist við uppljóstrun Stundarinnar en ljóst er að orðspor hennar hefur beðið hnekki ef hún hefur orðið uppvís að lygum. Það er að minnsta kosti skoðun samfélagsrýnisins Illuga Jökulssonar.
,,Því miður er Vanda Sigurgeirsdóttir ekki heiðarleg. Eitt er nú að þiggja milljónatugi frá mannréttindaníðingum eins og Sádum. Annað er að reyna að ljúga sig út úr vandræðum. Vanda heldur því fram fullum fetum að KSÍ hafi fengið blessun utanríkisráðuneytisins fyrir þessum tiltekna leik. Eins og fram kemur hér spurði KSÍ utanríkisráðuneytið alls ekki um landsleik í fótbolta, heldur um önnur verkefni. Hvenær ætla íslenskir valdamenn að skilja að „it’s not the crime, it’s the cover-up“?,“ skrifar Illugi og deilir áðurnefndri frétt Stundarinnar.
