Sveinn Rúnar V Pálsson var sakfelldur í Héraðsdómi Norðurlands eystra, þann 25. október, fyrir stórfelld skattalagabrot í rekstri fyrirtækisins Þrif og ræstivörur. Hins vegar var fallið frá ákæru um peningaþvætti.
Sveinn Rúnar var ákærður fyrir meiriháttar skattalagabrot og peningaþvætti við rekstur einkahlutafélagsins L1007, sem áður hét Þrif og ræstivörur. Þrif og ræstivörur eru núna í fullum rekstri á Akureyri undir nýrri kennitölu og starfar Sveinn Rúnar þar.
Sveinn Rúnar var daglegur stjórnandi fyrirtækisins sem varð gjaldþrota, var með prókúru og skráður varamaður í stjórn þess fram til 2019 en varð síðan framkvæmdastjóri félagsins. Honum er gefið að sök að hafa ekki staðið skil á virðisaukaskatti fyrir rekstrarárin 2016, 2017 og 2018, samtals 203.562.442 kr.
Hann var jafnframt sakaður um að hafa aflað félaginu ávinnings að þessari sömu fjárhæð, nýtt ávinninginn í þágu hlutafélagsins, en það flokkast undir peningaþvætti. Eins og áður segir var fallið frá þessum hluta ákærunnar fyrir dómi.
Sveinn Rúnar játaði skýlaust sök hvað varðar þann hluta ákærunnar sem eftir stóð, um skattsvik. Var hann sakfelldur og dæmdur í tveggja ára skilorðsbundið fangelsi. Hann var jafnframt dæmdur til að greiða risaháa sekt, 386.959.976 kr., í ríkissjóð. Greiði hann ekki sektina innan fjögurra vikna frá uppkvaðningu dómsins þarf hann að sitja í eitt ár í fangelsi.
