Dele Alli er sagður nálgast lágpunkt á ferli sínum sem knattspyrnumaður. Fjallað er um hrakfarir hans í enskum miðlum.

Hinn 26 ára gamli Alli er nú á mála hjá Besiktas í Tyrklandi. Hann er þar á láni frá enska úrvalsdeildarfélaginu Everton.

Alli þótt eitt sinn einn mest spennandi leikmaður heims. Nítján ára gamall var hann keyptur frá MK Dons til Tottenham. Þar lofaði hann góðu framan af en svo fór að halla undan fæti. Hann var seldur til Everton í janúar.

Þar byrjaði Alli aðeins einn leik áður en hann var lánaður til Besiktas í sumar.

Í Tyrklandi hefur leikmaðurinn skorað eitt mark í sjö leikjum og alls ekki heillað.

Knattspyrnustjóri Besiktas hefur viðurkennt að hann hafi búist við meira af leikmanninum þegar hann sótti hann.

Tottenham og Everton sömdu þannig í janúar að síðarnefnda félagið myndi ekki borga neitt strax fyrir Alli. Kaupverðið í heild getur þó farið upp í 40 milljónir punda. Það er þó virkilega ólíklegt. Tottenham fær fyrstu tíu milljónir punda kaupverðsins þegar, eða ef, leikmaðurinn spilar tuttugu leiki fyrir Everton.

Þá fær Tottenham 25% af kaupverðinu sem Alli verður seldur á frá Everton. Besiktas getur virkjað klásúlu í lánssamningnum við Everton og keypt Alli á sex milljónir punda, geri félagið svo fyrir janúar. Annars mun Alli kosta félagið átta milljónir punda næsta sumar.