Eins og DV greindi frá í morgun var lögregla kölluð til að fjölbýlishúsi við Keilusíðu á Akureyri í gær eftir að hundur hafði glefsað í barn. DV tók viðtal Halldóru Larsen, íbúa í húsinu, sem sagði að margoft hafi verið kvartað undan hundinum undanfarin ár og hann veki börnum í húsinu mikinn ótta. DV ræddi einnig við eiganda hundsins, konu sem kannast ekki við að hundurinn hennar bíti. Konan brast í grát í símtalinu og var mjög slegin yfir tíðindum gærdagsins.
Halldóra Larsen hafði samband við DV aftur í dag og benti á að ekki hafi verið búið að fá samþykki allra íbúa í húsinu við Keilusíðu fyrir hundinum. „Eigandinn hefur ekki fengið þær undirskriftir til að fá að hafa hann og eftir atvikið í gær þá mun það ekki gerast.“
Halldóra greinir einnig frá því að fundur hafi verið vegna fréttar DV hjá Akureyrarbæ. Hafi eigandi hundsins verið kölluð á fundinn.
Halldóra leggur áherslu á að hún vilji hundum og öðrum dýrum allt hið besta en þessum hundi sé svo illa sinnt að hann eigi alls ekki heima í fjölbýli.
Fyrrverandi nágranni konunnar sem á hundinn hafði samband við DV og greinir frá mjög erfiðri sambúð við hundinn. Sú kona vill ekki láta nafn síns getið en hún segist hafa búið í næstu blokk við eiganda hundsins í átta mánuði:
„Á þeim tíma munaði engu að hann dræpi köttinn minn, hann réðist að þriggja ára gömlu barninu mínu með þeim afleiðingum að ég sparkaði í hundinn til að grípa barnið frá og oftar en einu sinni réðist hann að okkur ef við gengum bílaplanið til að fara í eða úr bílnum og vorum við mæðgur oft bara lokaðar inn í bíl af ótta við hundinn og hvað hann myndi gera næst! Ég ræddi sjálf margoft við eiganda hundsins sem þá reyndi að kalla í hann eða taka hann inn. Maður sér hana aldrei úti að ganga með hundinn en alltaf eru börn með hann úti í bandi sem ráða ekki við hann. Það þarf að stoppa þetta áður en eitthvað alvarlegt gerist.“
Ath. Eftir vinnslu fréttarinnar ræddi DV við eiganda hundsins á ný og verður það viðtal birt í fyrramálið.
