Óvissustigi hefur verið lýst yfir á Norðurlandi eystra, Norðurlandi vestra og á Austurlandi vegna veðursins sem spáð er á morgun, sunnudaginn 25. september. Í dag hefur mikið verið fjallað um veðrið sem er yfirvofandi en lögreglan hefur nú birt færslur á Facebook-síðum sínum til að vekja sérstaklega athygli á því.
„Á vef veðurstofunnar kemur fram að í dag (laugardag) mun hvessa, suðvestan hvassviðri eða stormur undir kvöld. Því fylgja snarpar vindhviður. Í fyrramálið má gera ráð fyrir að vindur snúist í norðvestan 15-23 m/s í fyrramálið með slyddu og/eða snjókomu til fjalla. Undir kvöld á að stytta upp,“ segir til að mynda í færslu lögreglunnar á Norðurlandi eystra.
Lögreglan vill því biðja fólk um að huga að lausamunum eins og trampolínum, garðhúsgögnum og svo framvegis. „Þá viljum við einnig biðja verktaka að huga að framkvæmdasvæðum, girðingum, krönum og öðrum lausamunum og tryggja að allt sé vel fest.“
Fólk sem hefur í hyggju að ferðast á milli landshluta er bent á að hálka getur verið á heiðum. „Lögregla ráðleggur fólki að fylgjast vel með veðri og fresta ferðum þar til veðrið hefur tekið að skána.“
