Rúnar Már Sigurjónsson mætti á æfingu í gær með ÍA í Bestu deildinni en mun ekki semja við liðið. Rúnar er án félags eftir að hafa yfirgefið CFR Cluj í Rúmeníu.
Rúnar er 32 ára gamall miðjumaður og hefur verið í atvinnumennsku frá árinu 2013. Hann á að baki 32 A-landsleiki fyrir Ísland.
„Nei,“ sagði Jón Þór Hauksson þjálfari ÍA í samtali við 433.is í dag þegar hann var spurður að því hvort Rúnar Már væri að ganga í raðir ÍA.
Rúnar er að byggja hús fyrir sig og fjölskyldu sína á Akranesi en eins og er leitar hugur hans áfram út í atvinnumennsku.
„Hann mætti á æfingu með okkur í gær til þess að halda sér í formi. Það er bara hugsað þannig að hann sé í formi þegar eitthvað kemur upp úti. Við vildum fá hann og gerðum alveg tilraun til þess, hugur hans leitar út.“
Rúnar Már lék með Val hér á landi áður en hann hélt í atvinnumennsku en hann hefur spilað í Svíþjóð, Sviss, Hollandi, Kazakhstan og nú síðast Rúmeníu.
