Guðlaugur Þór Þórðarsson, umhverfis-, orku- og loftslagsráðherra, slasaðist í svokölluðum göngufótbolta á Landsmóti UMFÍ 50+ í Borgarnesi á sunnudag. Tveir leikmenn slösuðust í leiknum og þurfti að blása leikinn af vegna þessa.

Þetta kemur fram á vefsíðu landsmótsins.

„Aðeins voru nokkrar mínútur liðnar af geysilega spennandi leik þegar Guðlaugur Þór Þórðarson, Borgnesingur og umhverfisráðherra,- orku- og loftslagsráðherra, tognaði á fæti að talið er í kjölfar hælspyrnu. Hann þurfti að hverfa af velli til að kæla meiðslin og hætti leik. Skömmu eftir að blásið var til seinni hálfleiks féll andstæðingur hans niður. Talið er að hann hafi slitið hásin. Hann var borinn af velli. Ekkert er vitað um líðan þeirra,“ segir í fréttinni.

Reglur í göngufótbolta eru með þeim hætti að aðeins er leyfilegt að ganga með boltann en að öðru leyti eru sambærilegar reglur og í venjulegum fótbolta.

Guðlaugur Þór er sagður hafa sýnt góð tilþrif í leiknum áður en hann slasaðist en myndir af þeim tilþrifum má sjá á vefsíðunni.

Í stuttu samtali við DV sagðist Guðlaugur vera hinn brattasti þrátt fyrir atvikið, en hann er við vinnu í ráðuneytinu í dag. „Ég fer svo lítið hægt yfir,“ viðurkennir hann þó.