Selfoss fer afar vel af stað í Lengjudeild karla. Liðið er á toppi deildarinnar með 13 stig eftir fimm umferðir.

Gary Martin, sóknarmaður liðsins, var í viðtali í útvarpsþættinum Fótbolti.net á X-inu í gær. Þar hrósaði hann liðsfélögum sínum í hástert.

Hann ræddi sér í lagi sóknarlínu liðsins sem samanstendur af honum, Gonzalo Zamorano og Hrvoje Tokic.

„Ég held að við séum með betri framlínu en sum liðin í efstu deild ef ég á að vera hreinskilinn. Hvernig ÍBV gat látið Gonzi (Gonzalo) fara, ég mun aldrei skilja það. Ég trúi ekki að þeir hafi ekki haldið honum,“ sagði Gary Martin.

Gonzalo var á mála hjá ÍBV í fyrra en Gary, sem er fyrrum leikmaður félagsins, sagðist hafa heyrt orðróm um að Spánverjinn væri á lausu.

„Ég heyrði orðróm í fyrra um að hann yrði ekki áfram svo ég sagði Deano (Dean Martin, þjálfara Selfoss) að við þyrftum að fá hann, ég vissi hvað hann gæti gert fyrir okkur.“