Klukkan 00.21 í nótt var tilkynnt um skemmdarverk í Kópavogi. Þar var maður, með hamar í hönd, sagður hafa ráðist að konu og kasta hamrinum í bifreið hennar. Hann var farinn af vettvangi þegar lögreglan kom. Bifreiðin er töluvert skemmd.

Á sjöunda tímanum í gær varð árekstur tveggja bifreiða í Hlíðahverfi. Enginn slasaðist. Annar ökumaðurinn var handtekinn en hann er grunaður um að hafa verið undir áhrifum áfengis og fíkniefna og ítrekaðan akstur sviptur ökuréttindum. Hann var vistaður í fangageymslu.

Um klukkustund síðar varð árekstur tveggja bifreiða í Hlíðahverfi. Annar ökumaðurinn fann til eymsla í hnakka eftir höggið. Hinn ökumaðurinn, tjónvaldurinn, var sagður undir áhrifum vímuefna. Hann yfirgaf vettvang þegar hann heyrði að lögreglan væri á leiðinni. Hann var handtekinn síðar og er grunaður um að hafa verið undir áhrifum lyfja/fíkniefna. Hann var vistaður í fangageymslu.

Tveir ökumenn til viðbótar voru handteknir í gærkvöldi og nótt grunaðir um að vera undir áhrifum fíkniefna. Annar þeirra er einnig grunaður um vörslu fíkniefna. Hinn reyndist vera sviptur ökuréttindum og ók um á stolinni bifreið. Hann var vistaður í fangageymslu.