Ekki verður upplýst um framgang rannsóknar á máli knattspyrnumannsins Gylfa Þórs Sigurðssonar, sem er grunaður um að hafa brotið kynferðislega á ólögráða einstaklingi, fyrr en eftir páska. Þetta segir í skriflegu svari lögreglunnar í Manchester við fyrirspurn Vísis.
Farbann Gylfa rennur út þann 17. apríl næstkomandi en Gylfi hefur verið laus gegn tryggingu frá því stuttu eftir að hann var handtekinn í júlí á síðasta ári.
Í svari lögreglunnar í Manchester segir að ekki eigi að búast við neinum fréttum af máli Gylfa fyrr en í fyrsta lagi á sunnudaginn. Þá megi gera ráð fyrir því að engin svör fáist um málið fyrr en eftir viku.
Ekkert hefur heyrst frá Gylfa Þór síðan hann var handtekinn en meint brot hans er sagt hafa átt sér stað árið 2017. Þá hefur lögreglan í Manchester ekkert sagt um framgang rannsóknarinnar utan þess að hún sé enn í gangi.
Þann 20. janúar fyrr á þessu ári kom fram í svörum lögreglunnar í Manchester við fyrispurn Fréttablaðsins að Gylfi yrði áfram laus gegn tryggingu til 17. apríl næstkomandi. Fyrirkomulagið hefur nú verið framlengt fjórum sinnum en það var fyrst framlengt í ágúst, síðan í október og svo í janúar.
Gylfi hefur ekkert leikið fyrir Everton síðan að hann var handtekinn og nú er orðið ljóst að hann mun ekki leika fleiri leiki fyrir félagið þar sem að samningur hans rennur út í sumar.
