Karlmaður á fertugsaldri lést eftir fall á vinnusvæði í Urriðaholti í Garðabæ eftir hádegi í dag. Þetta kemur fram í tilkynningu frá Lögreglunni á höfuðborgarsvæðinu.
Tilkynning um slysið barst á þriðja tímanum og héldu lögreglan og sjúkraflutningamenn þegar á staðinn, en maðurinn var úrskurðaður látinn á vettvangi.
Í tilkynningu lögreglunnar kemur ennfremur fram að ekki sé hægt að greina frá nafni hins látna að svo stöddu en hann var erlendur ríkisborgari.
„Lögreglan og vinnueftirlitið rannsaka tildrög slyssins,“ segir í tilkynningu lögreglunnar.
